বরগাঙ'অ গদা পানি

ছবিঃ সংগৃহীত

-শৈলেন চাকমা

৯-৩-২০২১

বরগাঙ'অ গদা পানি শুগেই গেলেহ্

হালা হালা গাছ'অ গুত্যা ঈদোত তুলি দে!

হুবোত এলহ্ তোমা আদাম'য়ান?

এক দিন আজুলোই বরগাঙ লামুনি যাদে

আজু দেগেই দের!

চাদে আজু, দাঙর গাজ'অ গুত্যাবু দেগজ!

এযহ্ গলি যেই ন'অ পুরোই।

সিবে আমাহ্ ঘর'অ পুগেদি উদোন'অ গাচ্চো সি

ইবি দেগিলে এযহ্ আদাময়ান ঈদোত উদে!

তলে লামিলে রাজ ঘরানউ ঈদোত উদে,

এযহ্ চোগ ফেলে ফেলেএ দেগঙ বরগাঙ'অ পারত সমার'অ হিঝিগ-হাঝাগ'অ র'অ।

উইও চাদে পজিম অ'দি সিন্দি এলহ্ পাগোন্দি বুয়ান

দগিনোদি চাদে দেগজ এক্কু টুগ ভিদে, সিয়োত কার্বাজ্যা ঘরান

উত্তরেদি রিঙি চা, সিয়োত তেবোন্যা তলে খলগ'অ বুয়ান এলহ্?

সেক্যা ঝালাব্বর তোন পাত'অ চিদে নেই,উনোউ নেই

আহ্! আজু এদগ বজর বিদি গেলহ্,হেনে'এযহ্ ঈদোত আগে সি?

আজু গদা পানি ভরি এত্যা বেগে হজ'অ বর'অ ল বদি লাগ

কনে কুধু পরাণ বাজেবাগ কুধু গরিবাগ তিদেব্বর বসত্তি গরিবাগ, তেম্বান'অত বজিলাগ,

হিয়ে কলাগ দেশ কুল ছাড়ি শরনার্থী যেবাগ,কিয়ে কলাগ এল মুড়োত ফেগ বাজা বানি থেবাগ!

সেক্কে হি চেদন এলহ্ দে নে? আমি বরগাঙ'অ পারত সমার মিলি রেংহারির

এযহ্ চোগোত ভাজে দহ্ আজু!

নানু বিদিং-বাদাং গরি মরে সমার জাগত্তুন আহত ধরি তানি আনিলো

ন'অ দেগজ? পানি গঙি এযেত্যা!

চোগো পানি ফেলেই ফেলেই মামা করত উদি ঘরান রিঙি চেই যেওঙ,

মা! আহ্ কুধু যেবং ঘরান ফেলেই?

ডুবি যার, মুড়ো তুগুনত্তুন চেই রয়োঙ।

এযহ্ চোগোত ভাজে ঘরান ডুবি যানা,চোগোত ভাজে ভাত'অ রাদত আলু কুরি ভাত গরাজ জুক্কানা।

ঈদোত উদে সে-সব কাল'অ সঙ্গি সমারউন কুধু আজি যেওন?

ঈদোত উদে সে-সব সুগোর গিরিত্তি কুধু আজি যেয়ে?

এযহ্ জাত বেইয়ে রেনা-রেনি

এযহ্ ন'অ ফিরে আল্যাঙ' তুজিমপুর'অ কোচপানা নি।