তরে নিনেই ভাবং

শৈলেন চাকমা 

এক দলা মাদি! মন-অ রিবেং ফুলি গিরগিরেই,

আমা জাগা হারি নেজাদন কালা কবা আহ চিদিরেই;

বলে জোড়ে ললাগ কারি বানেলাগ শরনার্থী। 

বেগ মানুজোর আজার স্ববন দেগেই দুগো পথ লোলে গুজি,

তর বুগো লো দিলে ঢালি গেলেহ্ পিত্থিমিত্তুন আজি;

গাবুজ্জ্য-লগে হুজিয়ে  ললাগ তর আওজোর  পত্তান গুজি।

সে পদত হদক হুজি বুগোর লো দিলাগ ঢালি।

চিত ন- পুজ্জ্য গরি মনর সাহজ বানিলাগ এক ঝাঁক গাবুজ্জ্য

লারেয়ত লামি জুক্কোল অলাক,

হুজিয়ে বুগি ললাগ সজপদর আনি।

পার ওই যেবাগ হালামুড়ো আহ লাঙেল হত্তা দি

একবুক আজাবানি গাবুজ্জ্যর বেলহ্ পহর যার লামি,

হাদেই দিলাগ কদক সুগ- দুগোর জীংহানী। 

হুজি রান্যা পোরেই যাদন, আদদন মন-অ হুজিয়ে

ঝাড়- তারুমোত তিদেব্বর গরি থেবাক নিরিবিলি;

রেতও সঙবাগ হাদিযায় স্ববনে স্ববনে নিগিলি।

মোন- মুড়ো সেরে সেরে তোগাং বানা তরে

পত্যি রেদোত স্ববনে দেগং   তরে,

তর হদা শুনিলে এযেহ্ হানানি

এদক্কি নিরেতিত্তে হেনত তুই যুনি থেদে বাজি;

থেদং বেগে মিলি আজি আজি......।