এযহ্ কোচপেই তরে ভজমান

ছবিঃ শৈলেন চাকমা 

শৈলেন চাকমা 

মোন-অ আদামর জুম ঘরত বজি জিরোনী হলাত,

সঙ্গি সমারুন দেগি তর হদা ঈদোত তুলি

 কয়েক পুদো চোগ-অ পানি চোগ লেবেরেই পড়িলু। 

রন- হলাত মাত্তল্যা আঝি পেলাঙ বেই পড়ের,

আবাদা আবাদা তর হদা ভাবি চোগো কনাত চোগো পানি জমের;

মন-অ হুজিয়ে সজপদর কানাত গরি কদক টেঙ-অ হুজ মিলেই আত্যাই।

মুড়ো উদোনী সলাত নলা পেদ বদি এযেহ্ 

তেব তেব ঘাম-অ পুদো ঝড়ি ঝড়ি পড়ে,

সে দুগোত তো দহ্ তর আঝিবু ন-অ হমেহ্।

এযহ্ পতপত্যা তরে দ্বি-চোগোত ভাজে

ইক্কে তরে ঈদোত তুলি মর মনান হানি উদে,

মর বুগোত হন্না সেল মারে সুলেই সুলেই উদে  ? 

রেদ সঙবাগ জাগি বিচ্ছোন বিজিরেই তোগাঙ এযহ্ তরে,

 জনম ভরি মনহারী থেবেহ্ কয়োচ মরে;

তুই যেওজ মরে ফেলেই আঝি ভালুদ্দুর! 

রাগ-অ আগুনোত ডাঙা যার মনান বাশ পাদা আগুন সান,

বনা বদি বদি তুলে তুত্যা বৈয়্যার য়ান।

তর বুগো লো যে নিযেয়ি হারি তারে ভজ লুগেই গরিবোং সত্তর-অ  সান,

সেক্কে মরি যেব-অ মর মনর তুত্যা বৈয়্যার-অ আগুনান।

অক্ত অক্ত পরানগর হুজলী গরে,

তরে দেবার মনানে ভারি দারাজ গরে

হুদু গেলেহ্ পেম হুদু পেম হিজেনি? 

হুদু আগজ হবারে কন ভিন আদামর গাভুর লগ-অ সমারে,

হমলে এবেহ্ ফিরি হমলে আরো আদিবোং বেগে সমারে।