শৈলেন চাকমা
পরানি সাঝন্য অক্তত ত সিদু এম!
গাঙ-অ পারত এল গাজ-অ তলে বাত্তি জ্বালেই বাচ্ছেই থেজ,
বিজিরে বিজিরেই হুজ পেলেই তর সিদু এম;
আদিখ্যা অক্তত দেলেহ্ হবে মরে এচ্ছোজসি দাদা! ভালক বজর পর।
পরানি সাঝন্যা অক্তত ত সিদু এম!
মর হেয়্যা এরা দেগি চোগো পানি ন-অ ঝড়েজ;
পরানি তত্তেই হেয়্যা এরা শুগেই যার।
শুনেম তরে মর স্ববনর মোন- মুড়ো, ছড়া নালর পজ্জনয়ানি,
মনর মুরোত বানি রাগেয়োং তরে শুনেম এচ্চি;
এচ্ছি শুনিজ পরানি! চিৎ-অ মুরোত পুরি।
পরানি তর সিদু যেক্কে এম শুনেম!
জীংহানী পাদারী কধানি!
বঙ পাদারে হাদেয়ে জীংহানী,
শুনেম তরে মশা পুগি হামর-অ কধানি;
শুনেম তরে মোন-অ গরর ঈজোর-অ কধানি।
পরানি তর সিদু যেক্কে এম শুনেম!
কাজলং,সাজেক,রেইংখং দাঙর তারুমও কধানি,
আরও শুনেম রেইংখং সিল চাদারা কধা;
শুনেম তরে টেগা, শঙখ পানি নাল-অ গঙারর কধা।
পরানি এলেহ্ শুনেম তরে,
রামেট্টং,ফালিটাঙগি,কেওক্রাডং,চিম্বুক, দাঙর দাঙর মোনোর কধা;
বেক্কানি শুনি উগুরী ন-অ উদিজ পরানি ইয়ানিত স্ববনত বেড়েয়োং।
মর ফিরি যানা পর বেক্কানি ঈদোত রাগেজ পরানি!
আহ বজর ফিরোনিত ন-অও ফিরি পারঙ,
সেক্কে ভাবি লোজ দোল পিত্থিমিত্তুন আজি যেওঙ;
আর ন-অ শুনেম সেক্কে তরে রেইংখং, সঙঘ, টেগা পানি নালও কধা,
ন-অ শুনিবে কাজলং, রেইংখং,সাজেক রিজেব তারুমোর কধা;
আহ ন-অ শুনিবে রামেট্টং,কেওক্রাডং,ফালিটাংগি,চিম্বুক দাঙর দাঙর মোনোর কধা।
No comments:
Post a Comment